Øyvind Nesvåg

Prosjekta som får støtte skal bidra til betre vatnkvalitet, god økologisk tilstand i vatn og auka kunnskap om tilstanden i vassdrag, kystvatn og grunnvatn.

– Det er høge søkjartal og fleire gode søknadar. Den store interessa for tilskotsordninga gjer at søknadsbeløpet overstig midla me disponerer, men me har gjeve støtte til så mange som mogleg, seier Anneli Vatshaug Jenssen, rådgjevar i plan-, miljø- og samfunnsavdelinga i Rogaland fylkeskommune.

(Les meir under videoen)

Kantvegetasjon og kunnskapsinnhenting

Tilskotsordninga er eit verkemiddel for å nå måla i regionalplan for vassforvalting. Planen er retningsgjevande for korleis me vernar vassmiljøet mot øydelegging, og korleis me kan forbetre og rette opp att miljøtilstanden der forholda ikkje er gode nok.

Les meir om regionalplan for vassforvaltning​​​​​​​

Eit av tiltaka som får støtte er planting av kantvegetasjon. Klepp kommune mottek 100 000 i tilskot for å plante tre og buskar langs vassdrag i dei åtte jærkommunane. Vegetasjon langs vassdrag bidreg til nedfall av insekt og næringsstoff som gjev mat til livet i vatna. Tre og buskar gjev òg skugge som hindrar uttørking og store svingingar i vatntemperaturen.

– På Jæren er det tidvis stor mangel på vegetasjon langs vassdraga. Dette er eit viktig prosjekt som kan skapa ringverknadar ved å motivere fleire grunneigarar til å plante meir, seier Vatshaug Jenssen.

Kunnskapsinnhenting for å reetablere laks og aure i Tauvassdraget får også støtte. Tilbakeføring av fisken vil blant anna kunne bidra til reproduksjon av elvemusling. Den raudlista elvemuslingen, som reinsar opp mot 50 liter vatn i døgnet, lever nemleg som larve på fisken sine gjeller den første levetida.

Tiltak som får støtte i 2023