Asfaltsesongen starta i byrjinga av mai og mange fylkesvegar i Rogaland får ny asfalt dei neste månadane.

– Arbeidet med å legge ny asfalt skjer heile døgnet. Asfaltarbeid er støyande, og eg forstår at arbeidet er forstyrrande for naboar. Grunnen til at arbeidet skjer også på kveldar og netter, er omsynet til trafikantane, fortel prosjektleiar Christian Gryte i Rogaland fylkeskommune.

Rogaland fylkeskommune har skrive fire kontraktar for asfaltering og fresing med tre entreprenørar: Velde Asfalt AS har fått kontrakten for Nord-Jæren og Dalane. NCC Industry AS har fått kontrakten for Ryfylke. Peab har fått dei to kontraktane i nord-Rogaland.

Dei tre leverandørane skal produsere og legge nesten 76 000 tonn asfalt.

Asfaltsesongen varer til godt ut på hausten, kanskje så lenge som november. Dette avheng av vêret.

Prosjektleiar Gryte ber publikum vise omsyn og følge skilting og dirigering.

– Ta omsyn til dei som jobbar langs vegane. Arbeidsfolk langs vegane er spesielt utsett for ulykker, poengterer han.

PS! Det kan bli endringar undervegs.