Alvhild Nordtveit, Drude Simlenes, Anneline Endresen og Helene Hagen var ute på trilletur då gang- og sykkelvegen blei opna

Torsdag 6. februar opna Rogaland fylkeskommune offisielt den nye gang- og sykkelvegen i Sandeid. Rogaland fylkeskommune har bygd gang- og sykkelveg langs den sørvestre sida av Sandeidvegen (fylkesveg 514), frå Helgelandsvegen ved Sandeid kyrkje til Sandeid fengsel ved Lærdal.

No er det tryggare å gå og sykla til skulen og til fritidsaktivitetar. Bustadområde, bedrifter på strekninga, tilsette og innsette i Sandeid fengsel bruker òg den nye gang- og sykkelvegen. Rundt samfunnshuset er det bygt fortau og busslommer på begge sider av vegen. Det er òg bygt nye busslommer ved fengselet.

Liubov Jursiene til venstre og Zydrunas Jursa slipp nå å gå i vegkanten når de skal gå frå huset sitt og til jobb og sentrum.

Nokre av dei som fekk med seg opninga var Liubov Jursiene og Zydrunas Jursa, som bur i byggefeltet ved den nye gang- og sykkelvegen. No slepp dei å gå i grøftekanten når dei skal gå frå huset sitt og til samfunnshuset og kyrkja i Sandeid.  

–  Eg er veldig glad, for no kan vi gå og jogge trygt. Vi ser at det er mange som trenar på den nye gang- og sykkelvegen, og mødrer med barnevogn går saman her, fortel Jursiene.

Fylkesordførar Ole Ueland fekk æra av å klippe snora for den nye vegen. Og ordføraren i Vindafjord Ole Johan Vierdal var med og heldt båndet. Ordføraren sa i talen sin at han var nøgd med den nye gang- og sykkelvegen, men at han skulle gjerne hatt meir gang- og sykkelveg.  

– Vi har bygt strekninga vi opnar i dag, og frå Ølen til Økland, så då står midtpartiet igjen, sa ordføraren i talen sin. Han spøkte med at hvis fylkesordføraren hadde fleire midlar tek han gjerne i mot. 

Gnisten arbeids- og aktivitetssenter som ligg ved den nye gang- og sykkelvegen, var med på åpninga.

Kaka var god syntes denne gjengen.

Grønt til sommaren

Byggjestart var i april 2023 og den nye gang- og sykkelvegen vart overlevert til fylkeskommunen 7. januar 2025.

– Framleis gjenstår å så gras og nokre av veilysa manglar, men i løpet av sommaren blir det grønt og fint, seier prosjektleiar Ivar Kalkvik i Rogaland fylkeskommune.

Prosjektet er eit samarbeid mellom fylkeskommunen og Vindafjord kommune. Vats anlegg har vore entreprenør. Gang- og sykkelvegen er bygd med fylkesvegmidlar og kosta 108,4 millionar kroner.

Dette er bygd

• 1,6 km gang- og sykkelveg
• 450 meter fortau
• nye veglys på heile strekninga
• fire nye busslommer

Slik var vegen før

Slik er det no.