Håvikterminalen blei bygd som del av T- forbindelsen og var ferdig i 2012. Terminalen er eit knutepunkt for fleire bussruter, og enkelte passasjerar må vente lenge på korresponderande bussar.
No har Rogaland fylkeskommune oppgradert.
– Området er verutsett, og difor har vi oppgradert med venterom og toalett. Vi har òg sett av areal til sykkelparkering, fortel prosjektleiar Cato Severinsen i Rogaland fylkeskommune.
Oppgraderinga av terminalen kostar 6,2 millionar kroner og er betalt av fylkeskommunen.
Hærverk er den store utfordringa for kollektivterminalar og venterom, for eksempel i Aksdal og på Flotmyr.
– Entreprenøren Hereid Hus AS har levert veldige gode og robuste løysingar, og eg håper vi slepp problem med hærverk, seier Severinsen.
Den offisielle snorklippinga skjer klokka 11:15. I tillegg til fylkesordførar Marianne Chesak, talar avdelingsleiar i Rogaland fylkeskommune, Astrid Eide, og Karmøy-ordførar Jarle Nilsen.